‘Salvemos a Fracha’ aborda a transformación medioambiental e patrimonial que vai supoñer a autovía A-57

A plataforma cidadá 'Salvemos a Fracha' segue a promover accións públicas e reivindicativas dentro da súa campaña informativa sobre o proxecto da autovía A-57 e, máis concretamente, o seu primeiro tramo entre Vilaboa e A Ermida, que ven de ser adxudicado á empresa San José. A súa última actuación é unha xornada informativa aberta a todos os cidadáns coa que se pretende favorecer o debate arredor desta vía e a transformación irreversible que vai implicar en todos os puntos do seu trazado.
A xornada informativa, que leva por título ‘Transformación medioambiental e patrimonial do territorio’, está programada para as 20.00
horas deste xoves 25 de xuño na Casa das Campás e conta coa participación do enxeñeiro técnico agrícola Ángel Bravo, o especialista en Xeografía Manuel Fortes e o catedrático de Economía Aplicada da Universidade de Vigo Xulio Pardellas.
Os tres especialistas achegaranse ao proxecto da A-57 e analizarán a non necesidade do vial e o alto custo que vai ter a nivel ambiental, patrimonial e socioeconómico. Se o Ministerio de Fomento segue adiante con esta autovía, suporá desfacer o entorno natural da serra da Fracha e alterar o estilo de vida do rural, todo a cambio, ademáis, dun elevado 'despilfarro' de fondos públicos nun proxecto faraónico sen ningún beneficio para Pontevedra e a súa contorna.

XORNADA INFORMATIVA SOBRE O IMPACTO DA A-57 SOBRE A SERRA DA FRACHA E A SÚA CONTORNA

'Salvemos a Fracha' entrega 20.000 sinaturas ao Ministerio de Fomento para pedir que se paralice a autovía A-57

A plataforma vecinal 'Salvemos a Fracha' entregou hoxe 20.000 sinaturas ao Ministerio de Fomento para pedir que paralice o proxecto para construír a autovía A-57. Os apoios recolléronos tanto a través dunha petición na plataforma dixital Change.org como en persoa nos distintos actos reivindicativos organizados polo colectivo.

Con estas sinaturas pretenden demostrar que a este proxecto non só se opón un grupo de veciños, senón unha plataforma que conta co apoio de colectivos sociais, ecoloxistas, culturais... e co respaldo de miles de cidadáns de Pontevedra, Galicia e España, que apoian e defenden as razóns esgrimidas e piden a paralización do proxecto.

As sinaturas van dirixidas á ministra de Fomento, a pontevedresa Ana Pastor, e entregáronse por rexistro na delegación territorial do Ministerio en Pontevedra acompañadas por unha carta na que 'Salvemos a Fracha' recorda a Ana Pastor que os afectados "seguimos demandando ser recibidos polo subdelegado do Goberno en Pontevedra, Antonio Coello ou por vostede mesma como responsable do Ministerio de Fomento".

O colectivo reitera á ministra o seu convite a pasear pola serra da Fracha para que coñeza mellor este canto de Pontevedra que agora está en perigo e que é lugar de esparexemento habitual de miles de persoas e pídenlle que "como cidadáns temos dereito a ser escoitados e recibidos ou, polo menos, ter unha resposta ás nosas demandas".

A carta insiste en que o colectivo leva un ano opoñéndose ao proxecto da autovía A-57, defendendo o monte pontevedrés do que considera que será unha ameaza grave para o ámbito natural da Fracha e transmitindo que esta infraestrutura non é a circunvalación de Pontevedra que moitos políticos se empeñan en vender, non o é por razóns de lóxica (en atención ao seu trazado) e tamén por razóns técnicas. De feito, os propios técnicos do informe do Ministerio de Fomento refírense a esta autovía como corredor norte-sur A-57 e nunca como circunvalación.

Ao longo deste ano, as alegacións que presentaron 'Salvemos a Fracha' e outros colectivos afectados pola A-57 non foron tidas en conta e presentouse un recurso contencioso-administrativo ante a Audiencia Nacional.

Ana Pastor e Lores irmándanse para mentir e sacar rédito electoral da autovía A-57

A plataforma veciñal Salvemos a Fracha le con estupor as declaracións da ministra de Fomento, Ana Pastor, e o alcalde de Pontevedra, Miguel Anxo Fernández Lores, o seu novo apoio político á vista de que concordan nas políticas de infraestruturas. O anuncio de que as obras da autovía A-57 comezarán no verán é oportunista e responde a un interese por sacar rédito electoral no que coinciden a ministra do PP e o alcalde do BNG.

Para conseguir ese rendemento electoral Ana Pastor e Lores non dubidan en mentir aos cidadáns insistindo en que a A-57 é unha circunvalación para Pontevedra cando todos os técnicos consultados por Salvemos a Fracha negan que cumpra as condicións para funcionar como circunvalación e os propios redactores do proxecto de Fomento se refiren a esta infraestrutura como “corredor”.

Tanto o Ministerio de Fomento, promotor da obra, como o Concello de Pontevedra ignoran aos afectados pola autovía e néganse a manter unha reunión con eles. Volvemos recordarlle que queremos manter ese encontro e que no transcurso do mesmo os nosos técnicos poderían aclararlles conceptos que parece que non teñen claros. Saberán cal é a diferencia entre circunvalación e corredor norte-sur que non comunica a Pontevedra? A A-57 é unha falsa circunvalación., é un corredor norte-sur.

A plataforma veciñal non pretende politizar a loita para parar o proxecto da autovía A-57, pero ante o uso electoralista que lle están a dar Ana Pastor e Lores vese obrigada a denunciar que neste proxecto non se moven para responder aos intereses dos cidadáns senón ao seus para intentar gañar votos enganando aos electores. 

Lores só presume dos premios que recibe o centro urbano de Pontevedra e esquécese do rural mentres que Ana Pastor reproduce as políticas do progreso mal entendido que priorizan o asfalto en épocas de recortes en servizos públicos como sanidade ou educación.

Salvemos a Fracha, respaldada pola opinión de técnicos, ecoloxistas e intelectuais do eido social e político, insiste na petición de que o Ministerio de Fomento repense a autovía A-57 e pide que non apure os trámites para poder arañar uns poucos votos cando o proxecto foi denunciado na Audiencia Nacional e está pendente de que se resolva a petición de paralización cautelar das obras.

Salvemos a Fracha colabora con Anedia nunha convivencia familiar e unha andaina polo monte ameazado pola A-57

O mirador da Fracha / Anedia Galicia

A deportista Susana Ruíz Mostazo impartirá este sábado 11 de abril unha charla-coloquio en Pontevedra sobre o dobre reto de facer montañismo tendo diabete dende os 11 anos. Compartirá as súas experiencias escalando o Himalaya ou desprazándose polos glaciares de Groenlandia para transmitir de que maneira os límites na práctica deportiva en grandes altitudes os pon un mesmo e non a enfermidade.

A actividade, organizada pola asociación de nenos e nenascon diabete de Galicia (ANEDIA), está programada para as 11.00 horas na Casa das Campás e ten como finalidade trasladar á sociedade en xeral e aos nenos/as con diabete en particular que a súa enfermidade non supón un impedimento para poder cumprir os seus soños e facer fronte aos retos que se marquen.

A charla-coloquio forma parte dun completo programa de actividades que na mañá do sábado incluirá, ás 10.30 horas, a reunión do xurado do concurso escolar de debuxo titulado Diabete e Deporte organizado en colaboración coa Concellería de Educación e Deporte do Concello de Pontevedra no que participaron ao longo das últimas semanas alumnos e alumnas dos colexios de educación Infantil e Primaria de Pontevedra.

Xa ao mediodía, ao remate da intervención de Susana Ruíz, dará comezo unha convivencia familiar ao aire libre na Serra da Fracha. A partir das 13.30 horas as actividades desprazaranse á area recreativa do Outeiro Navío, onde está previsto que se realice un ‘picnic’ colectivo en contacto coa natureza. A partir das 16.00 horas, realizarase a III Rota de Sendeirismo de Anedia, que nesta ocasión conta co asesoramento da plataforma Salvemos a Fracha.

O atleta con diabete Diego Castro guiará aos participantes nunha rota de aproximadamente dúas horas e media de duración e que ten dificultade media. Persoas coñecedoras da zona compartirán cos camiñantes as singularidades desta Serra, a única que ten o Concello de Pontevedra, e as distintas lendas e historias do lugar. A primeira metade adentrarase por sendeiros e camiños de terra e a segunda subirá ao miradoiro da Fracha, onde se pode gozar de impresionantes vistas das rías de Pontevedra e Vigo.

O deseño circular da ruta permite que se realice enteira ou só a metade. No medio do percorrido farase unha parada para tomar un refrixerio e realizar os controis de glicosa necesarios e, ao remate, volverase á mesma área recreativa de partida para participar nunha merenda e en xogos populares.

Quedades convidados!

‘Salvemos a Fracha’ debate sobre o impacto social e hidrolóxico da autovía A-57 mentres AGE leva o tema ao Parlamento

A plataforma cidadá 'Salvemos a Fracha' organiza esta semana unha nova actividade do ciclo para debater e informar sobre o proxecto da A-57. Nesta ocasión, a xornada informativa organizada en colaboración co Ateneo de Pontevedra abordará o impacto hidrolóxico que terá a infraestrutura na Serra da Fracha e en toda a súa área de influencia.

A charla, que leva por título ‘Cortar as Correntes. Atentado contra a integridade do rural’, está programada para as 20.00 horas deste mércores 25 de xaneiro na Casa das Campás e conta coa participación do presidente da asociación Vaipolorío, Gonzalo Sancho, e de Arturo Estévez, un dos activistas que loitou contra a construción da autoestrada AP-9 na década dos anos 70 e 80.

Tanto a plataforma veciñal como outros colectivos veciñais e ecoloxistas xa alertaron en anteriores ocasións sobre o gravísimo impacto que terá a A-57 na Serra da Fracha e no rural pontevedrés en xeral. Nesta ocasión, tomará a palabra un dos colectivos que tamén alegou contra o proxecto da controvertida autovía, Vaipolorío. O seu presidente fará un repaso sobre a afección que terá a infraestrutura en acuíferos, ríos e, en xeral, na subministración de auga.

Con esta nova entrega das súas charlas informativas, ‘Salvemos a Fracha’ pretende favorecer entre os cidadáns de Pontevedra o debate arredor do proxecto da A-57 e das numerosos atentados que está a sufrir o rural nos últimos tempos. Arturo Estévez compartirá as súas experiencias durante a loita contra a AP-9 e a maneira na que a través da mobilización social se conseguiu minimizar algú dos impactos previstos a nivel ambiental e na poboación. Ademais, analizará o impacto social que tivo a autoestrada e que teñen en xeral as grandes infraestruturas .

A actividade coincidirá co mesmo día no que Alternativa Galega de Esquerda (AGE) leva o debate sobre a autovía ao Parlamento de Galicia. Este partido xa amosou o seu rexeitamento ao proxecto e promoverá o debate de todos os grupos políticos representados no Pazo do Hórreo sobre a autovía e, en particular, sobre o seu primeiro tramo, que transcorre entre Vilaboa e A Ermida e actualmente é o único que está en fase de licitación e ten aprobado o informe medioambiental.

UN CLARO NO BOSQUE

Máis infraestruturas de transporte?

A accesibilidade é un ben en si mesmo, canta máis mobilidade mellor, máis infraestruturas de transporte xeran máis benestar. Este esquema cultural é claramente dominante en Galicia (e non só). Durante os últimos 25 anos, políticos de todas as cores, de esquerda ou de dereita, nacionalistas galegos ou españois, colocaron as infraestuturas de transporte entre as súas principais prioridades. O culto a estas infraestruturas segue a ser maioritario entre políticos e xente do común, mais algo semella ter comezado a mudar. Por primeira vez, en varios puntos do país ao mesmo tempo, poboacións locais rexeitan frontalmente novas estradas. E desde diversos ámbitos e por razóns diversas, cuestiónase como nunca antes a promoción de máis infraestruturas de transporte.

Medra a oposición social a novas estradas

Nas últimas décadas, a única infraestutura de transporte obxecto dunha oposición frontal socialmente significativa foi o corredor do Morrazo. A plataforma creada para combatela foi quen non só de organizar un importante protesto social senón tamén de articular un discurso moi sólido a prol da mobilidade sustentábel. Agora unha nova plataforma, en Defensa dos Montes do Morrazo, oponse ao desdobramento do corredor en autovía promovido pola Xunta, e faino desde un enfoque sustentabilista e non apenas centrado nos efectos socioambientais negativos locais, demandando unha consulta cidadá sobre o modelo de mobilidade na comarca. 

Un non rotundo a outra autovía é o da plataforma veciñal Salvemos a Fracha, nome da serra que ficaría destruída de se construír o corredor de 6,4 Km proxectado entre A Ermida (Pontevedra) e Vilaboa.  Sería o primeiro tramo da autovía A-57, promovida polo Ministerio de Fomento e concebida como alternativa de balde á autoestrada do Atlántico (AP-9). Unha das accións da plataforma foi abrir unha petición en Change que xa logrou o apoio de máis de 15.000 sinaturas.  Neste caso, a oposición á autovía non vai da man da defensa dun modelo de transporte sustentábel, pois propóñense como alternativas á A-57 a supresión da peaxe da AP-9 e a ampliación, xa prevista, da ponte de Rande, medidas que non contribuirían a unha mobilidade menos insustentábel. A plataforma si fai unha crítica xeral ao impulso de máis infraestruturas de transporte, convidando a reflexionar “sobre o significado do progreso nun país como o noso, onde temos tan poucos espazos protexidos, onde as infraestruturas son iguais ou mellores cás doutros países da UE. Onde seguimos pensando que os Km de asfalto son sinónimo de riqueza” (1).

A supresión da peaxe na AP-9 tamén é a alternativa defendida pola plataforma veciñal Variante Non á construción dunha terceira vía paralela á estrada N-550 e á AP-9 entre Pontecesures e Valga. Rexeitan calquera das variantes propostas, “por todo o dano que fan, porque son innecesarias, e máis nos tempos de recortes que vivimos”.
Tamén hai un certo rexeitamento veciñal á construción da variante que uniría Portosín (Porto do Son) con Noia á altura da nova ponte sobre a ría. Moitos veciños e veciñas consideran que sería un malgasto innecesario que traería moitos prexuízos para a súa calidade de vida. Unha variante que para algúns “achegaría máis a vila mariñeira de Portosín a Marbella”. Un camiño que xa leva medio percorrido. Tamén hai unha petición na rede á que te podes sumar.
Outra plataforma veciñal, Non á A-76  pola Ribeira Sacra, demanda un proxecto alternativo ao trazado previsto para a autovía A-76 (Ourense-Ponferrada) ao seu paso pola Ribeira Sacra “que non afecte ningún núcleo de poboación e que non poña en perigo esta zona de especial fraxilidade paisaxística”, reivindicación que podemos apoiar asinando a petición que crearon. Esta autovía deterioraría gravemente a Ribeira Sacra, impedindo a súa declaración como Patrimonio da Humanidade pola UNESCO, como manifestaron recentemente os técnicos encargados da preparación da candidatura. A plataforma non entra a valorar a necesidade ou non da autovía, aínda que o tráfico entre Ourense e Ponferrada, duns 5.000 vehículos diarios, non a xustifica. A A-76 tamén afectaría negativamente a Serra da Enciña da Lastra.

O consenso sobre as infraestruturas de transporte debilítase

As voces críticas coa “adición” ás infraestruturas de transporte en Galicia e no Estado español son contadas. Incluso entre as organizacións de defensa ambiental, só algunhas, como Ecoloxistas en Acción, promovendo accións como a campaña  Infraestruturas de transporte e crise, teiman na denuncia permanente das consecuencias negativas da construción masiva de infraestruturas de transporte e do aumento desbocado da mobilidade motorizada. Os imaxinarios colectivos e das institucións sobre o transporte e a mobilidade aférranse aínda á esperanza de retomar canto antes o camiño do crecemento, na crenza de que “máis é mellor”.
Porén, o cuestionamento das infinitas bondades das infraestruturas de transporte non semella xa tan minoritario como era até hai ben pouco tempo. Neste senso, o máis significativo sería o abandono do culto ás infraestruturas de transporte por parte dunha forza política maioritaria, de se confirmaren nas próximas convocatorias electorais os resultados que as enquisas auguran a Podemos, e sempre que este partido mantiver e concretar o sostido no borrador do seu programa económico elaborado por Juan Torres e Vicenç Navarro. O documento propón unha moratoria, sen medo “ao efecto aparentemente negativo no prazo inmediato sobre os indicadores convencionais de crecemento económico”. Sinala que o grande investimento en infraestruturas dos últimos anos “foi a principal fonte de corrupción e de gastos de mantemento desorbitados e sen apenas rendemento social”.
Os “papeis de Bárcenas” apuntan á relación entre  corrupción política e  promoción desmedida de infraestruturas de transporte.

Continuar lendo en Un claro no bosque
en

 Blogs

'Salvemos a Fracha' dubida da fiabilidade dos informes de Fomento sobre as previsións de tráfico da futura A-57

A plataforma cidadá 'Salvemos a Fracha' pide ao Ministerio de Fomento que lle faga chegar os estudos de tráfico que realizou coa previsión de vehículos diarios que usarán a autovía A-57 se algún día chega a construírse. O colectivo amosa as súas dúbidas sobre a fiabilidade dos informes actualizados dos que bota man a Administración estatal, que prevén que circulen por esta nova vía un total de 33.000 coches ao día.

‘Salvemos a Fracha’ pregunta ao Ministerio en que datos se basean para falar desas previsións e tamén cal é o estudo no que sustentan que se reducirá o tráfico na estrada nacional N-550. Esta afirmación parece máis propia do “conto da leiteira” ca dun estudo serio realizado por unha Administración pública e, ademais, contradí as conclusións dun informe realizado por un técnico independente para a plataforma.

Este estudo aportouse ao recurso contencioso-administrativo que se presentou nas últimas semanas contra o proxecto da A-57 e fala dun previsible aumento do tráfico na N-550 se chega a construírse o primeiro tramo da autovía, o que transcorre entre Vilaboa e A Ermida, que ata agora é o único que está licitado e conta con orzamento do Goberno estatal.

O colectivo veciñal quere aclarar que os seus obxectivos seguen a ser a defensa da Serra da Fracha, do xeito de vida rural, da sustentabilidade como principio que debe rexer a política a todos os niveis e do medio ambiente, de maneira que non se integra na loita que manteñen aberta outros colectivos pontevedreses contra a construción dunha planta de compostaxe na parroquia da Canicouva.

‘Salvemos a Fracha’ amosa o seu rexeitamento a que esta planta desfaga a Serra da Fracha e coincide co resto de colectivos nas críticas á falta de diálogo da que fai gala o Goberno local de Pontevedra na súa relación cos movementos sociais e cos veciños do rural. Nos últimos días mantivo unha reunión con outras asociacións para o coñecemento mutuo das causas polas que se manteñen en loita e coincide en que non parece idóneo situar a planta de compostaxe no lugar elixido cando hai outros máis axeitados coma un polígono industrial, pero non pasou a formar ningunha plataforma conxunta contra o proxecto da Canicouva.

‘Salvemos a Fracha’ promove o debate sobre a A-57 e os atentados ao rural

A plataforma cidadá 'Salvemos a Fracha' segue a promover accións públicas e reivindicativas dentro da súa campaña informativa sobre o proxecto da autovía A-57 e, máis concretamente, o seu primeiro tramo entre Vilaboa e A Ermida, o único que xa está en fase de licitación e conta co informe medioambiental aprobado. A súa última actuación é unha xornada informativa aberta a todos os cidadáns coa que se pretende favorecer o debate arredor desta vía e das numerosos atentados que está a sufrir o rural nos últimos tempos.

A xornada informativa, que leva por título ‘Política do Chapapote. Atentado contra a integridade do rural’, está programada para as 20.00 horas deste xoves 29 de xaneiro na Casa das Campás de Pontevedra e conta coa participación do enxeñeiro técnico agrícola Ángel Bravo e do mestre e presidente da Mancomunidade de Comunidades de Montes de Pontevedra Carlos Morgade.

Ambos os dous, conducidos polo xornalista pontevedrés Oskar Vieitez, promoverán o debate sobre o gravísimo impacto que provocará a A-57 na Serra da Fracha e no rural pontevedrés e como se está a destruír o entorno rural e social de Pontevedra como consecuencia das políticas do asfalto que se promoven nos tempos actuais. Analizarán a temática global dende unha perspectiva socio-económica e ambiental.

Carlos Morgade fará unha intervención máis xeral centrada en en analizar a actualidade do medio rural galego e nos usos e ameazas dos montes comunais. Ángel Bravo, autor do informe presentado por ‘Salvemos a Fracha’ contra o estudo de impacto ambiental deste primeiro tramo da A-57, rematou recentemente un novo informe sobre esta autovía para acompañar o recurso contencioso-administrativo presentado pola plataforma contra o proxecto. Este xoves fará unha análise da necesidade e impacto ambiental desta infraestrutura.